الفصل الرابع (2)

 

11- رجالة كتيرمش بتهتم بإيديها و ضوافرها وتلاقى ايديها مهببة وعاملة زى الصنفرة وضوافرها سودة و معضعضة..إوعى! اغسل ايديك باستمرار قص ضوافرك
خشنين حط كريم جلسرين قبل النوم (مش عيب) أصل القذارة و الخشونة مش دليل على الرجولة لكن على حاجة تانية أنا محرج أقولها.. متقرفش المزز منك يا عم الأمور

12- فى رجالة كتيربتفتف وهى بتتكلم ودى حاجة بتقرف المزز جدا فلاحظ نفسك و لو كنت من النوع ده يبقي دايما خلى مسافة كويسة بينك و بينها وانتوا بتتكلموا علشان متلاقيهاش لو جت لك المرة اللى بعدها لابسة لك بالطو مطر أو ملفوفة فى كيس نايلون.

13- فى النهاية لو انت مظبط شكلا وزى الفل لكن هايف وبتضحك عمال على بطال ومبتقولش أى كلمة مفيدة ,كله عندك لوز العنب وشتراوس الجنزبيل
يبقي سنارتك مش هيتشعلق فيها غير بساريا هبلة وهتبقي بالنسبة للبنات بونبوناية القعدة مش اكتر ودايما اللى هيكسب البلطية الجامدة صاحبك التقيل ده اللى دماغه متكلفه أبو كلام و تصرفات موزونة,آه خفة الدم مطلوبة جدا وفى بنات بتحب الراجل اللى بيضحكها زيى كده لكن مش بس كده

14- هزرنا كتير؟ نيجى للجد بقي!! شخصيتك يا معلم!!

المزز بتموت فى الراجل أبو شخصية قوية بس افهمها صح, الشخصية القوية يعنى:

1: صوت واطى و مع ذلك مؤثر جدا
2: تقنعها برأيك مش تقضيها تعسف
3: تديها الحرية الكاملة كبنى ادم كامل
4: تحترم نفسك و تخترمها هى و رغباتها
5: ذكاء عاطفى فى التعامل مش طخ طخ
6: بتشركها فى أدق تفاصيل حياتك المهمة
7: مبتكدبش و لا بتلاوع تحت أى ظرف

15- عمر الصوت العالى ماكان دليل على الرجولة بالعكس انت لما بتعلى صوتك بيطلعلك فجأةبقدرة قادر يافطة فوق دماغك مكتوب عليها"يوجد هنا رجل ضعيف" لان القوى مابيستخدمش صوته علشان يأثر فى اللى ادامه وفعلا "صوتك العالى دليل على ضعف موقفك" زى ماقالك اخوك كريم عبد العزيز فى محطة مصر...

16- البنات كائنات عاطفية و حساسة (طب ماتزقش...مشيها معظمهم) يعنى م الآخرمفتاح أى بنت هو الكلمة الحلوة(مش مقصود السهوكة وكتر الكلام الى يموع النفس)لأن البنت بتحب بودانها لكن لسانك يكون مدلدل منه 10 تعابين بيلدعوا فى البنت ليل ونهار تتريق عليهم و تضحك و فاكر نفسك عم الظريف
ابقى قابلنى فى بينوس المحور يوم 32 شهر 13 الساعة 25 لو سنارتك غمزت صح ياماو...

17- فى نفس الوقت ياريت كلامك الحلو يكون مواكب للعصر.. انشالله تتعلم من الأفلام الجديدة لكن كلام قديم و "ياستو انا" و "نهارك سعيد" يبقي هى مكالمة واحدة و هتقولك"عمت مساءا سيدى الدوق"و مش هييجى عليك صبح و انت معاها.. و مش بعيد تسمعك احلى تووت تووت "من فضلك ضع السماعة هذه رسالة مسجلة"

18- كمان أفكارك لازم تكون كلها جديدة و "اب تو ديت" حديثة بكل المقاييس
البنت بتنبهر جدا من الواد المطقطق اللى فاهم حاجات كتير المثقف اللى بيقعد يحكيلها حكايات غريبة و جديدة عليها تشدها و اللى تحس انه هيفهمها حاجات كتير حتى لو كانت هى دودة كتب ولو هى مثقفة فعلا
يبقي دورك هيبقي أصعب يا أستاذ

19- اقرأ..القراءة بخلاف أنها للجميع هتنمى مخك و تكبر دماغك وتخليك كده ليك
هيبه و جاذبية خاصة، وتلاقى مواضيع كتير تتكلم فيها سواء مع المزه أو مع اى حد لكن كل مرة تشوفها تكلمها فى مشكلة الحضرى و قصة حياة أبو تريكة أو تسكع لها نشرة الأخبار هما قعدتين و هتجيبلك شورت و فانلة وكاب وقنبلة تنسفك بيها من حياتها

20- خليك طموح..طموح لكن تنام طول الليل تتسهوك فى التيلفون وتصحى مش عارف تروح شغلك ولا كليتك, مع الوقت هتزهق منك حتى لو بتقول فيها شعر البنات بتحب الراجل الناجح الطموح اللى يحسسها بالأمان وبإن بكرة أحسن من النهاردة بكره يا جيانا الجديد ويوريها عمليا أن حياتها معاه هتكون دايما بتتطور للأحسن،
ابشع حاجه انها تحس انك محلك سر...عبده أرشيف!

21- الانسان المشهور، الناجح فى شغله، دراسته بيكون محط أنظار وتقدير بغض النظر عن نوع الشغل أو الدراسة...مادام شغل شريف، ماهو مش معقول تكون لسه بتاخد مصروف من بابا وبتدور على صيد وعرايس بحر و حركات...عيب صح؟؟؟

22-المزز بتموت فى الواد الصايع اللى بيعرف حاجات ومهارات كتير حتى لو كانت تافهة يعنى مثلا فى ولاد بتعرف تقلد الفنانين أوتغنى أو تطبل وفى ولاد عندهم جمل دمها خفيف زى لازمه بيقولوها فى مواقف معينة وفى كمان ولاد
بتعمل خدع سحرية أولعب غريبة بالكوتشينة أهو اتعلم لك أى حاجة من الحاجات
العبيطة دى صدقنى بتجيب مع المزز

23- جميل ان انت تبقي انسان مبهج متفائل وقعدتك حلوة بتهزر و حفظلك شوية نكت بتتكلم فى مواضيع ظريفة تهم اللى قدامك بتهون على اللى مرتبط بيها مشاكلها،لكن كآبه و بوز شبرين و قاعد تشتكى و ودش اكتئاب بيحمى اللى ادامك كده تسمم السمك يا ودييييع وفى السنة اللى عملوا فيها "1000 مبروك" تلاقيها هى عملت لك "طير أنت"

24- فليكن شعارك دائما "وبحب الناس الرايقة اللى بتضحك علطول أما العالم المضايقة انا لأه مليش فى دول" ثبت علميا ان "الضحك بيطول العمر"فنصيحتى يابنى ابعد عن المزه اللى مقضياها عياط و نكد و شكوى من كل حاجة فى الدنيا اللى بتعشق الميلودراما وبتدخل الافلام النكد علشان تعيط مخصوص و اعرف ان هى دى بطلة النكتة بتاعة "بكرة النكد بكره" خد ديلك فى سنانك و اجرى...

قريبا ...... الباقي